ඇරයුම්...

තනියෙන් ඇවිත් කවදා හරි තනියම පිට වෙලා යන දිගු ගමනක අතරමැද මොහොතක නවාතැන් ගන්න ආපු 'ආගන්තුක සගයෙක්' මම. ජීවිතේ විඩා නිවන හෙවනක් හොයා ගන්න හිතා ගෙන ගිනි කාස්ටක අවුවෙ හසරක් නොදැන යන ගමන් උනත් ලැබෙන මොහොතක නිවාඩුවෙන් තානායමකට ගොඩ වෙලා තව මං වගේම උන් එක්ක දොඩමළු වෙන්න ලැබුනොත් මම නොනැවතී යන්නෙ නෑ. මෙතනට ගොඩ උනෙත් ඒ හන්දම තමයි. ඉතින් එන්න... මේ 'කැනිමඬල' යටට... දොඩමළු වෙන්න මොහොතක්..

Wednesday, December 21, 2016

෴ මඩ වගුර තවම ඉදිරියෙන් ෴




මඩ  වගුර දරුණුය. පවස සතපවනු පිණිස පැන් පොදක් බීමට එහි බට බොහෝ සත්තු නොසිතූ අයුරින් එහිම එරී ගියහ. ගොඩ එන මගට පළමුව මරණයම ඔවුන් කරා පැමිණියේය. මේ බැව් කල් තියා  දකින නුවණැත්තෝ මඩ වගුරෙහි නොබැස මඩ නොතැවරීම වෙනත් මගකින් වගුර මගහැර එතෙර වෙත්. හරි මග සොයාගැන්ම දුෂ්කර වුවද ඊට යහපත් වෙනත් මගක් නැත්තේමය.

අපහසුවෙන් සොයා ගත යුතු වූ එමග සොයා ගත නොහුනහොත් මෙතෙරම අඳුරු වැටී අතරමං වනු නිසැකය. එනිසාම අවදානම දකිමින්ම වුවද වගුර හරහා ගොස් නොඑරී ප්‍රවේශමෙන් එතෙර වූ සත්තු ද වෙති. මෙසේ යහතින් එතෙර වීමට නම් පිරූ පෙර පින් යහමින් තිබිය යුතු වෙයි. නැතහොත් අසරණව එරී එහිම ගිලී  මිය යනු ඇත.

වටින් එගොඩ වන මගක් මෑතක නොපෙනෙන බැවින් මඩ වගුර හරහා යෑමටය සිදුවී ඇත්තේ. වගුර මතින් යන ඒ ගමන නොඑරී යන්නට, ගමනේ බිහිසුණු බවත් අවදානමත් හඳුනාගත් අයෙකු සිටීම පිටිවහලක් විය හැකිය. සිහියෙන් නුවණින් ගියහොත් නොඑරී එතෙර වීමට මග තවම ඇත. උත්සහාය සහ උනන්දුව නොබිඳී පවත්වා ගැන්ම මඩ වගුරෙන් එතෙර වන එකම ක්‍රමය වනු ඇත.

ඒ බව නිති සිහි වේවා!

1 comment: